Neytendastofa

Með rafrænu skilríki er hægt að undirrita skjöl rafrænt. Rafræn undirskrift hefur sama gildi og hefðbundin undirskrift ef hún er fullgild. Til þess að rafræn undirskrift teljist fullgild þarf hún að vera studd fullgildu vottorði og gerð með öruggum undirskriftarbúnaði.

Með lögum nr. 28/2001 um rafrænar undirskriftir voru lögfestar reglur hér á landi sem innleiddu tilskipun Evrópuþingsins og ráðsins 1999/93/EB  um sama efni. Markmið tilskipunarinnar var að  samræma reglur innan bandalagsins um notkun rafrænna undirskrifta í ljósi aukinna viðskipta í rafrænu formi. Í lögunum er m.a. fjallað um réttaráhrif rafrænna undirskrifta, kröfur til vottorða, undirskriftarbúnaðs og vottunaraðila.

Neytendastofa hefur eftirlit með því að starfsemi vottunaraðila fullnægi öllum kröfum í lögum um rafrænar undirskriftir. Vottorð sem gefin eru út á Íslandi eru einnig gjaldgeng í öðrum ríkjum á Evrópska efnahagssvæðinu ef þau uppfylla kröfur laganna.

Neytendastofa er í samstarfi við eftirlitsaðila með rafrænum undirskriftum í öðrum löndum og er stofnaðili að FESA, the Forum of European Supervisory Authorities for Electronic Signatures - sjá  http://www.fesa.eu/index.html.

Ítarlegri upplýsingar um rafrænar undirskriftir má finna á vefnum skilriki.is.