Alþjóðlega mælieiningakerfið

SI er skammstöfun fyrir alþjóðlega mælieiningakerfið „Système International d'Unités“. Það sem einkennir SI-mælieiningakerfið er að einungis ein eining er notuð um hverja mælistærð. SI-mælieiningakerfið á sér rætur í MKS-kerfinu (metri, kílógramm, sekúnda) sem varð til á seinni hluta 19. aldar.  Það varð þó ekki fyrr en á 11. þingi CGPM, alþjóðaráðsins fyrir vog og mál, árið 1960 sem SI-mælieiningakerfið var samþykkt.  Síðan þá hefur það náð mikilli útbreiðslu og er nú orðið ráðandi mælieiningakerfi í heiminum. 

Samkvæmt lögum nr 91/2006 um mælingar, mæligrunna og vigtarmenn er notkun SI-mælieininganna lögboðin á Íslandi. Þetta er síðan áréttað í reglugerð nr 1160/2011 um mælieiningar.

Grunneiningar SI-kerfisins eru:

Eining	Skammstöfun	Mælistærð
kílógramm	kg	massi
metri	m	lengd
sekúnda	s	tími
amper	A	straumur
kelvin	K	hitastig
kandela	cd	ljósstyrkur
mól	mol	efnismagn

 

Aðrar einingar eru leiddar út frá þessum ásamt tugfeldum af þeim.  Þeir sem vilja fá nánari útlistun á SI-einingunum er bent á kverið SI-kerfið;  Leiðbeiningar sem gefnar eru út af Staðlarráði Íslands. Einnig er hægt að finna upplýsingar um kerfið á vefnum, t.d. eru gagnlegar upplýsingar um kerfð að finna hjá  alþjóðlegu mælifræðistofnuninni Bureau International des Poids et Mesures (BIPM)