Neytendastofa tók ákvörðun gagnvart Orkunni IS ehf. í september 2021 vegna fullyrðinga um lægsta og ódýrasta eldsneyti landsins. Niðurstaða Neytendastofu í málinu var að félagið hafi viðhaft villandi og óréttmæta viðskiptahætti og var félaginu bönnuð birting fullyrðinganna.
Neytendastofa hefur tekið ákvörðun gagnvart Ferðaskrifstofu Icelandia ehf. vegna auglýsinga og markaðssetningar félagsins. Auglýsingarnar lutu að fullyrðingum um kolefnishlutlausa, sjálfbæra og umhverfisvæna starfsemi, aðallega rútuferðir. Þá notaðist Icelandia einnig við orðmerki í markaðs- og kynningarefni sínu auk þess sem merkið var að finna á hluta ökutækja félagsins. Um var að ræða orðmerki með textanum „carbon neutral“ og „carbon neutral transfer“ umvafinn grænum hringjum.