Fara yfir á efnisvæði

Griffli heimilt að auglýsa Alltaf ódýrari en bannað að auglýsa Lang langflestir titlar á einum stað.

07.01.2010

Í ákvörðun Neytendastofu nr. 38/2009 er fjallað um auglýsingar og fullyrðingar Griffils m.a. í tengslum við skiptabókamarkað félagsins og verðkönnun Morgunblaðsins á námsbókum. Neytendastofu barst kvörtun vegna fullyrðinga Griffils um að Griffill væri „Alltaf ódýrari“ og að á skiptibókamarkaði Griffils væru „Lang langflestir titlar á einum stað“. Auk þeirra fullyrðinga var í ákvörðuninni fjallað um auglýsingar Griffils þar sem vísað er til þess að skv. verðkönnun Morgunblaðsins sé Griffill langódýrastur í námsbókum og samhliða því kynntar ýmsar bækur og vörur á tilboði sem notaðar eru til náms.

Neytendastofa taldi ekki ástæðu til að gera athugasemdir við slagorð Griffils um að Griffill sé „Alltaf ódýrari“ þar sem færðar voru fullnægjandi sönnur fyrir henni. Neytendastofa taldi fullyrðinguna „Land langflestir titlar á einum stað“ hins vegar of stórtæka m.v. staðreyndir málsins og bannaði Griffli frekari notkun hennar. Í ákvörðuninni er einnig rakið að Neytendastofa telji tilvísun í verðkönnun Morgunblaðsins, samhliða kynningu á öðrum bókum sem notaðar eru til náms, villandi enda mætti skilja auglýsinguna sem svo að þær hafi verið hluti af verðkönnuninni, þó svo hafi ekki verið. Þá fjallaði Neytendastofa um að auglýsingin bryti gegn lögum þar sem ekki kæmu fram allar þær upplýsingar sem krafa er gerð um í tilboðsauglýsingum. Þannig var í auglýsingunni kynnt tilboðsverð á vörunum án þess að greint væri frá fyrra verði og tilgreint að í boði væri takmarkað magn af tilboðsvörunum án þess að greint væri frá því hve margar þær væru.

Ákvörðunina má lesa í heild sinni hér

 

TIL BAKA