Fara yfir á efnisvæði

Stórverslanir standast ekki kröfur um verðmerkingar

25.06.2010

Dagana 26. maí – 9. júní 2010 fóru starfsmenn Neytendastofu í  30 stórar verslanir  með sérvöru á höfuðborgarsvæðinu. Kannaðar voru verðmerkingar og hvort samræmi væri milli þeirra og kassaverðs.

Af þessum 30 verslunum var aðeins ein verslun, Hagkaup í Smáralind, sem var með allar verðmerkingar í lagi. Fjórar verslanir voru með athugasemdir við yfir 25% af þeim vörum sem skoðaðar voru, Toys r us á Korputorgi, Byko í Breidd, BT í Skeifunni og Elko í Skeifunni . Ljóst er að starfsmenn allra þessara verslana þurfa að gera átak í verðmerkingum, enda sjálfsagður réttur neytenda að vörur séu verðmerktar, skýrt og greinilega og að verðið sé rétt.

Í þessari könnun bar mest á að vörur væru óverðmerktar frekar en það væri ósamræmi á milli merkt verðs vöru og verðs á afgreiðslukassa. Frá síðustu könnun í september 2009 hefur því lagast mikið samræmið á milli verðmerkingar á vörunni og verðs á afgreiðslukassa.  Þetta er þróun í rétta átt.

Neytendastofa hvetur fólk til að fylgjast með og skoða vel kassastrimilinn þegar greitt er. Ef um er að ræða misræmi  í verðmerkingum, t.d. á milli verðs á hillubrún og verðs í afgreiðslukassa, er almenna reglan sú að  verslanir eiga að selja vörur á því verði sem hún er verðmerkt,  líka þótt um mistök sé að ræða. Þetta gildir þó ekki ef sjá má, eða það ætti að sjást, að um mistök er að ræða. Þá gildir þetta heldur ekki ef röng verðmerking er ekki sök fyrirtækisins heldur hafi t.d. annar viðskiptavinur breytt verðmerkingu eða fært vörur til. Byggist þetta á því að neytendur velja vöruna á grundvelli verðmerkingarinnar en ekki á grundvelli verðs í afgreiðslukassa enda hafa neytendur engin tök á því að sjá það verð fyrr en komið er að því að greiða vöruna.

Listi yfir þær verslanir sem farið var í:

 Verslun   Heimilifang  Sveitafélag
 BT  Skeifunni 11  Reykjavík
 Byko  Fiskislóð 15  Reykjavík
 Byko  Breidd  Kópavogi
 Byko  Kauptúni 6  Garðabæ
 Debenhams  Smáralind  Kópavogi
 Elko  Skeifunni 7  Reykjavík
 Elko  Lindum  Kópavogi
 Europris  Fiskislóð 3  Reykjavík
 Europris  Korputorgi  Reykjavík
 Europris  Dalvegi 10-14  Kópavogi
 Europris  Tjarnarvöllum 11  Hafnarfirði
 Hagkaup  Kringlunni  Reykjavík
 Hagkaup  Holtagörðum  Reykjavík
 Hagkaup  Skeifunni 15  Reykjavík
 Hagkaup  Smáralind  Kópavogi
 Hagkaup  Litlatúni 3  Garðabæ
 Húsasmiðjan  Skútuvogi 16  Reykjavík
 Húsasmiðjan  Vínlandsleið  Reykjavík
 Húsasmiðjan  Helluhrauni 16  Hafnarfirði
 Ikea  Kauptúni 4  Garðabæ
 Ilva  Korputorgi  Reykjavík
 Max  Kauptúni 1  Garðabæ
 Múrbúðin  Kletthálsi 7  Reykjavík
 Pier  Korputorgi  Reykjavík
 Pier  Smáratorgi  Kópavogi
 Rúmfatalagerinn  Skeifunni 13  Reykjavík
 Rúmfatalagerinn  Korputorgi  Reykjavík
 Rúmfatalagerinn  Smáratorgi  Kópavogi
 Toys r´us  Korputorgi  Reykjavík
 Toys r´us  Smáratorgi  Kópavogi

TIL BAKA